DESCRIZIONE
È semp’ ’a stessa storia ’a dumméneca matina,
quando m’assetto e aspetto ’a gente ca vò nu cunsiglio
e pure si ’o mariuolo me cunfessa ’na rapina
’o guardo dint’ a ll’uocchie stanco e senza meraviglia.
Sapisse l’ata sera che m’ha ’itt’ ’onna Cuncetta,
che è asciut’ incinta e ’stu criaturo nun è ’e don Mattia
e sapenn’ ca isso sta scarfanno n’atu lietto
l’aggio mannat’ a casa sulo cu sei Ave Maria
Comme se fa, comme se fa...
Pe’ campà meglio t’ he’ cunfessà.
Ma ’sti preghiere nun servono a niente
si fra ddoje ore stai ancora a sbaglià
Maronna e si ve raccuntass’ ’a storia ’e Salvatore,
ca s’è jucato pure l’anima ’int’ ’e machinette.
Si avesse dato retta a’ ’o pàte fosse nu signore,
ajere ha accultellato a n’omme pe’ ’na sigaretta.
Invece stammatina ’o viecchio ha chiesto si è peccato
avere due rapporti al mese cu’ ’na prostituta
e dopo che m’ha cunfessato pure quanto spenne
se n’è asciuto dicénn’ “Padre, era minorenne”
Comme se fa, comme se fa...
Pe’ campà meglio t’ he’ cunfessà.
Ma ’sti preghiere nun servono a niente
si fra ddoje ore stai ancora a sbaglià
Ma nun putite immaginà che sofferenza è stato
unire in matrimonio Rosa cu’ nu carcerato,
a essa, ca vint’ anne fa pe’ mmé era ’o primm’ ammore
cu’ ’o core a piezz’ c’aggia avut’ dà ’a benedizione.
E quando cu’ chill’ uocchie nir’ e cu’ nu braccio rutto
m’ha ’itt’ “senza cattiveria, è stato mio marito”,
l’aggio strignut’ forte e forse non avrei dovuto
...Forse ero troppo vicino...
Comme se fa, comme se fa...
Pe’ campà meglio m’aggia cunfessà
Ma si pe’ vuje song’ ’o giudice ’e Dio
cocc’ peccat’ oggi ’o faccio pure je
---
L'articolo La Maschera - La Confessione di La Maschera è apparso su Rockit.it il 2016-01-29 16:27:33
COMMENTI